Фудбалерите на холандската репрезентација се првите четвртфиналисти на Светското првенство во Катар. Вечерва на „Калифа Интернешнл стадионот“ ги победија Соединетите Американски Држави со 3:1 (2:0).
Ова важеше за еден од порамномерните мечеви во четврт-финалето, иако „обложувалниците“ ги фаворизираа Холанѓаните. Со право, се разбира. Историја, фудбалска школа, Луј ван Гал, искуство и се што доаѓа со „лалињата“, против нација која се качува по скали кога е во прашање овој спорт, но испаѓа дека се уште се далеку од кремот на светскиот фудбал.
Започна со исклучителна шанса за Кристијан Пулишиќ по две минути игра, но феноменалниот Андрес Ноперт ги спречи Холанѓаните да налетаат на теренот на „Калиф“ со негатива.
Нешто покомпактните Холанѓани успеаја да казнат осум минути подоцна. Една од најубавите акции на турнирот ја видовме во 10. минута кога разликата беше направена на средината на теренот по неколку убави додавања на Блинд, Депај и Класен, а потоа сите продолжија да трчаат кон голот на Мет Тарнер. Топката дојде на страната на Дамфрис, Класен со своето движење ги одвлече американските стопери од Депај, кој останува сам на 12 метри и ја тресе мрежата за 1:0.
До крајот на првото полувреме немаше премногу шанси, освен ударот на Тимоти Веа кој Ноперт го скроти, но потоа непосредно пред паузата Американците повторно паднаа на колена. Повторно Дамфрис, кој беше нерешлива енигма за Адамс, Робинсон и останатите, ја испраќа топката во шеснаесетникот, а Дејли Блинд успева да ја подигне на белата точка и повторно се менува таблата. Блинд го прослави голот со својот татко, кој е еден од помошниците на Луј ван Гал.
Американците бараа начин да се вратат во мечот и успеаја. Во 76. минута успеаја да ја вратат акцијата по корнер, Пулишиќ нафрли од десното крило, а Хаџи Рајт со грб кон голот на чудесен начин ја префрли топката преку глава, но и сите останати играчи на Холандија и го смести во мрежата. Нереално, еден од најневеројатните голови некогаш видени на светските првенства.
Тоа беше трошка надеж за тимот на Грег Берталтер, но набрзо беше скршен од семоќниот Дензел Дамфрис кој со глава го погоди центаршутот на Блинд на втората статива за конечни 3:1.
Така Холанѓаните први се пласираа во четврт-финалето и го чекаат подобриот од дуелот меѓу Аргентина и Австралија, кој е на програмата вечерва.
