Шефовите на Њукасл ја разгледуваат можноста да го ангажираат поранешниот голман на Манчестер Јунајтед, Давид де Геа како замена за повредениот Ник Поуп.
Како што пренесува британскиот дневен весник „Дејли мејл“, во Њукасл сакаат брзо да пополнат место меѓу стативите бидејќи Поуп поради повреда на рамото ќе биде надвор од терените најмалку четири месеци, а можеби и пет.
Менаџерот на Њукасл, Еди Хау сега како голмани на располагање ги има Мартин Дубравка и Лорис Кариус, но со оглед на тоа што „страчките“ се активни дури во четири натпреварувања (Премиер лига, Лигата на шампионите, ФА и Лига купот), „Мејл“ тврди дека сака донесе нов голман и дека изборот паднал на поранешниот шпански репрезентативец.
Де Геа (33) е слободен играч откако летово по 12 години го напушти Манчестер Јунајтед бидејќи не бил во плановите на менаџерот Ерик Тен Хаг.
Имаше понуди од Саудиска Арабија, но како што неодамна изјави, сака да ја продолжи кариерата во Европа.
