Фудбалерите на Јувентус се во голема резултатска криза на почетокот на новата сезона во Серија А.
Неверојатно е дека по четири одиграни кола, Јувентус е само на 18 -то место со два освоени бода.
Старата дама и натаму е без победа во новата сезона, а во претходното коло Јуве ремизираше против Милан (1:1) на домашен терен, иако имаше водство од 1:0 скоро цел натпревар.
Јасно е дека има голема криза во Јувентус, па дури ни најстарите навивачи на клубот од Торино не паметат ваков лош старт.
По натпреварот против Милан, дури и Масимилијано Алегри ги загуби нервите и го крена гласот до своите играчи, и едноставно се обиде некако да ги „разбуди“.
Пред утрешното гостување на Специја, зборуваше и Пауло Дибала, кој рече дека играчите едноставно мора да бидат обединети и дека сигурно ќе излезат од моменталната резултатска криза.
„Во тешки времиња, немате друг избор освен да бидете обединети. Го направивме тоа во минатото и сега можеме и мораме да го повториме. Секогаш до крај“, рече Аргентинецот.
Натпреварот помеѓу Специја и Јувентус во петтото коло од Серија А се игра утре со почеток во 18:30 часот.
