Уругвајскиот дефанзивец Мартин Касерес во моментов е член на Фиорентина и конечно е подготвен да се врати на тренинзите откако се опорави од коронавирусот.
Фиорентина е меѓу клубовите во Италија кои имаа најмногу заразени, но ситуацијата драстично се подобри. Во моментов, само еден член на овој тим е заразен, додека другите тренираат во тренинг центарот без никакви проблеми.
Касерес беше меѓу заразените, но тој призна дека воопшто не знаел дека е позитивен на коронавирусот. Уругваецот откри дека го имал вирусот во неговото тело два месеци, без да знае што се случува, и дека дознал само пред две недели дека е заразен.
„Имав коронавирус два месеци без да знам за тоа. Имав некои симптоми помеѓу 8 и 15 март. За време на тренинзите дома, чувствував нешто во белите дробови и ми рекоа да останам во карантин и да излезам за 20 дена. Можеби вирусот се заљуби во мене, не знам. Вчера бев негативен за прв пат и се чувствувам како нов“, рече Касерес.
Касерес досега има одиграно 23 натпревари за клубот од Фиренца оваа сезона и успеа да постигне два гола. Иако има само 33 години, Касерес во својата кариера смени голем број на клубови, а покрај Фиорентина, тој играше и за Дефенстор, Виљареал, Рекреативо Хуелва, Барселона, Јувентус, Севиља, Саутемптон, Верона и Лацио.
