Агресивниот преоден рок на клубовите од Саудиска Арабија почна да ги плаши најмоќните европски клубови. Тренерот на Ливерпул, Јирген Клоп изрази голема загриженост поради ова.
Во овој преоден рок „црвените“ загубија двајца стандардни играчи од средниот ред, Џордан Хендерсон и Фабињо, кои заминаа во Саудиска Арабија. Кога на тоа ќе се додаде Роберто Фирмино, кој исто така тргна на тој пат, иако како слободен играч бидејќи договорот му истече на крајот на јуни, јасно е зошто германскиот тренер има одредена доза на страв.
-Влијанието на Саудиска Арабија во моментов е масивно. Најлошо е што трансфер периодот во Саудиска Арабија трае три недели подолго од овде. Ги повикувам ФИФА и УЕФА да реагираат. Мора да се најде решение. Но, навистина не знам што ќе се случи во овој момент – изјави Клоп.
Покрај гореспоменатите тројца, во Саудиска Арабија, меѓу другите, заминаа и Карим Бензема, Енголо Канте, Марсело Брозовиќ, Садио Мане, Рубен Невес, а пред сите во јануари Кристијано Роналдо.
