Лацио е најголемиот ривал на Јувентус во трката за италијанската титула оваа сезона.
Тимот на Симоне Инзаги одигра навистина добро до прекинот на сезоната и се само бод зад актуелниот шампион.
Се разбира, притисокот пред потенцијалното продолжување на сезоната во Лацио е огромен, а многу „престрелки“ меѓу водечките италијански клубови често може да се прочитаат.
Артуро Дијаконале, кој е задолжен за односи со јавноста во римскиот клуб, го критикуваше фактот дека првата ѕвезда на Јувентус, Кристијано Роналдо нема никакви проблеми со тренирањето во Мадеира, додека фудбалерите на Лацио се наоѓаат во домашна изолација.
Дијаконале е убеден дека тоа ќе му донесе предност на „Старата дама“ доколку првенството продолжи.
„Постојат одредени ТВ-канали кои се против Лацио и претседателот Лотита. Сè што правиме е лошо, навивачите се лоши и има кампања против нас. Зад нас се 120 години и мислам дека заслужуваме поголема почит”, рече тој и потоа продолжи:
„Очигледно има некаков фаворитизам. Зборувам за некои играчи кои не се вратиле во Италија додека нашите играчи се во домовите. Сум видел неколку фотографии од тренинзите на Роналдо на прекрасен терен. Тој се подготвува во тишина, но ние не можеме. Изгледа дека некои ќе имаат предност како ќе продолже сезоната“, рече Дијаконале.
