Белгискиот фудбалски репрезентативец Ромелу Лукаку призна дека имал понуда да ја продолжи кариерата во Ал Хилал, но додаде дека не е подготвен да ја напушти Европа, пренесуваат италијанските медиуми. Лукаку е член на Челзи, но е на позајмица во Рома до крајот на сезоната.
„Горд сум што Ал Хилал беше заинтересиран за мене. Сепак, по неколку разговори, се откажав од идејата да се приклучам на овој клуб. Ал Хилал е најголемиот клуб на Блискиот Исток. Лигата на Саудиска Арабија ќе стане една од најдобрите во светот. Сепак, не бев подготвен да ја напуштам Европа“, изјави Лукаку на прес-конференцијата на белгиската репрезентација.
Во летниот преоден рок имаше понуди од бројни клубови од Европа и Азија.
„Не сакам да ја заобиколувам темата. Сите ќе бидете шокирани кога ќе решам да кажам што се случило за време на летот. Ќе кажам сè кога ќе дојде време. Имаше моменти кога мислев дека ќе експлодирам. Сега сум фокусиран на она што најдобро го правам, а тоа е фудбалот“, додаде Лукаку, кој оваа сезона одигра осум натпревари за Рома и постигна седум гола.
Репрезентацијата на Белгија се подготвува во Тубиз за квалификацискиот натпревар за ЕП 2024 против Австрија, кој ќе се одигра в петок.
