Манчестер Јунајтед во следните неколку недели ќе испрати понуда до Тотенхем за капитенот на лондонскиот клуб и англиската репрезентација, Хари Кејн, пренесуваат британските медиуми.
Менаџерот на Манчестер Јунајтед, Ерик тен Хаг, им кажа на челниците на клубот дека Кејн е потенцијално клучен играч за шампионските амбиции на „црвените ѓаволи“ следната сезона. Тен Хаг сака што поскоро да ја реши ситуацијата и да открие дали може да го доведе капитенот на англиската фудбалска репрезентација во јуни.
Кејн има договор со Тотенхем до крајот на следната сезона, а британските медиуми пренесуваат дека претстојниот преоден рок може да биде последна шанса за лондонскиот клуб да добие отштета за англискиот интернационалец.
„Гардијан“ објави дека висината на отштетата би требало да биде поголема од 80 милиони евра доколку претседателот на Тотенхем, Даниел Леви одлучи да му дозволи на Кејн да го напушти лондонскиот тим на крајот на сезоната. Кејн оваа сезона во Премиер лигата постигна 28 гола на 37 натпревари.
