Тренерот на Баерн, Џулијан Нагелсман, призна дека тимот одиграл доста лошо во првото полувреме против Келн, но бил задоволен од она што го видел во вториот дел од натпреварот.
Баварците на „Алијанц Арена“ се намачија до реми 1:1 и се уште немаат победа во Бундеслигата, по продолжението на шампионатот.
„Замените беа одлични и во вториот дел добро застанавме на теренот. Келн бранеше многу длабоко во својата половина и ни отежна. Да постигневме гол порано, ќе им беше многу тешко. Но, нашиот настап по паузата е она што сакам да го видам. Убеден сум дека ќе се вратиме со добри резултати доколку демонстрираме исто ниво 90 минути“, изјави Нагелсман.
Тој беше прашан и дали промената на тренерот на голманите Тони Тапаловиќ негативно ќе се одрази на неговиот однос со Мануел Нојер.
“Не верувам. Жално е за Ману, но оваа одлука не е насочена против него“, одговори Нагелсман.
А на прашањето за чинот на Серж Гнабри, кој беше забележан во Париз ден пред натпреварот против Келн, тренерот на Баерн одговори:
Сакам да зборувам само за тоа што се случува на теренот, а не надвор од него“. Ни требаше повеќе свежина во вториот дел, па го сменив Гнабри“.
Но, спортскиот директор на Баерн, Хасан Салихамиџиќ не „изигра“ дипломат на оваа тема.
„Она што го направи Гнабри беше аматерски чин. Не му одговара на играчот на Баерн. Ден пред натпреварот играчите треба да се одморат“, изјави поранешниот играч за врска на Баварците.
