Новак Ѓоковиќ во петок за првпат ќе излезе на терен во Валенсија, во конкуренција на групната фаза на Дејвис купот, противник е Шпанија, но задачата ќе биде полесна од планираното.
„Очекував да играм овде со Алкараз“, изјави Новак, „Тој е тенисер кого многу го почитувам. Секогаш кога играме еден против друг, натпреварите се многу тешки. Тој е неверојатен тенисер и личност“.
Најдобриот тенисер во историјата ја препозна Шпанија како велесила на белиот спорт.
„Прво Рафаел Надал, а сега Карлос. Шпанија навистина има голема традиција во тенисот“.
Ноле најверојатно ќе игра против Алехандро Давидовиќ, првиот рекет на домаќинот во Валенсија. Давидовиќ е 25-ти во светот, еднаш го победи Ноле, но четири пати загуби.
„Алехандро е мој пријател, човек многу близок до мене и моето семејство. Во последните две-три години трениравме многу пати во Марбела. Ќе биде многу тежок дуел и за двајцата“.
Ноле веќе неколку години има куќа во Марбела, додека Давидовиќ е роден и живее во блиската Малага.
Доколку Србија ја победи Шпанија, ќе обезбеди пласман на завршниот турнир во Малага во ноември. Доколку српскиот тим загуби, ќе има шанса да оди понатаму, под услов во сабота да ја победи Чешка.
