Според информациите на германски Билд, управата на Баерн постигнала договор со Јулијан Нагелсман (33).
Нагелсман на тој начин ќе го наследи Ханси Флик, кој пред неколку недели објави дека го напушта Баерн на крајот од сезоната, а тој очигледно ќе ја преземе германската фудбалска репрезентација.
Баерн ќе плати до 30 милиони евра отштета за Нагелсман, што ќе биде рекордно обештетување кога станува збор за трансфер на еден тренер. Младиот и перспективен германски стручњак прави одлична работа со Лајпциг, а претходно постигна значајни резултати на клупата на Хофенхајм.
Тој имаше договор со Лајпциг до 2023 година, но тој побара од клубот да го одобри преземањето на великаните од Минхен, засновано на добри односи и коректност.
Што се однесува до Флик, тој направи неверојатни работи во Баерн во последните сезони, но оваа сезона имаше конфликти со спортскиот директор Хасан Салихамиџиќ, со кого често не се согласуваше за трансфери и други работи.
Флик најверојатно ќе замине како шампион на Германија, тоа ќе биде негова втора последователна титула, но тој не успеа да ја одбрани титулата во Лигата на шампионите, бидејќи неговиот клуб беше елиминиран од ПСЖ во четвртфиналето поради правилата за гол на гости.
Некогашниот играч за врска на Баерн минатата сезона го освои и Купот, потоа Суперкупот на Германија и Светското клупско првенство и Суперкупот на Европа. Во сезоната 2019/20, тој беше избран од УЕФА за тренер на годината.
Тој исто така имаше импресивна играчка кариера во Баерн бидејќи освои четири титули, Купот на Германија и Суперкупот, и играше во финалето на тогашниот европски куп во сезоната 1986/87.
Многу навивачи на Баерн деновиве изразија големо незадоволство од одлуката да ги остават Флик и Салихамиџиќ да останат. Дури е покрената и петиција за разрешување на поранешниот репрезентативец на БиХ, кој важи за еден од најодговорните во Баварија за не толку идеалната сезона 2020/21, која сè уште не е завршена.
