Челзи го совлада Норич со 3-1 во 30. коло од англиската Премиер лига.
Сините во овој натпревар влегоа со мисли надвор од фудбалскиот терен. Останаа без главниот спонзор, клубот е замрзнат поради санкции кон сопственикот Роман Абрамович, па функционалноста на европскиот шампион е загрозена.
Сепак, играчите собраа сили за победа кај Норич и постигнаа голови во раната фаза од натпреварот.
Херој е Мејсон Маунт кој постигна асистенција и гол. Во третата минута од корнер асистираше до Чалобаху кој погоди за 1:0, а потоа во 14. минута погоди за предност од 2:0.
Овој резултат остана на семафорот до 69. минута кога Норич успеа да ја намали предноста на гостите. Досуден е пенал, а Пукки погоди за 2:1.
Точка на овој натпревар стави Каи Хаверц со гол за 3:1 во 90. минута од натпреварот.
Нов триумф оствари и Њукасл. Најбогатиот тим во светот го совлада Саутемптон како гостин со 2:1.
Домашната екипа е прва која поведе на овој натпревар. Армстронг погоди за 1:0 во 25. минута, но засилувањата на „страчките“ во јануари донесоа пресврт.
Прво Крис Вуд израмни на 1:1 во 32. минута, а потоа Бруно Гимарес погоди за 2:1 во 52. минута.
Во друг натпревар, Вулверхемптон го декласираше Ватфорд со 4-0.
